राष्ट्रपति के ट्विटर म तीजन बाई के परिचय म छत्तीसगढ़ी म पोस्ट

राष्ट्रपति के ट्विटर हैंडल म हर अवॉर्डी के परिचय अंग्रेजी म हवय

रायपुर. छत्तीसगढ़ के पंडवानी गायिका डॉक्टर तीजन बाई ल शनिवार के देस के दूसर सबले  बड़का नागरिक सम्मान पद्म विभूषन ले सम्मानित करे गिस. तीजन बाई ये सम्मान पवइया छत्तीसगढ़ के पहिली नागरिक हवय.

एखर पहिली भारत सरकार उमन ल पद्म भूषन अउ पद्मश्री ल घलो सम्मानित कर चुके हे. शनिवार के राष्ट्रपति रामनाथ कोविंद ह तीजन बाई ल ये सम्मान परदान करिन.

राष्ट्रपति के ट्विटर हैंडल म पद्म सम्मान पवइया  लोग मन के फोटो के संग देश के संस्कृति अउ समाज म उंखर योगदान के जानकारी पोस्ट करे गिस.  खास बात ये रहिस के, ये ट्विटर हैंडल म हर अवॉर्डी के परिचय अंग्रेजी म देय गिस, लेकिन तीजन बाई के परिचय छत्तीसगढ़ी म पोस्ट  करे गिस.

प्रेसिडेंट ऑफ इंडिया ह ट्वीट करिन ‘कला-क्षेत्र बर डॉ. तीजन बाई ल भारत के राष्ट्रपति कोविन्द ह पद्म विभूषण दे हे. डॉ. तीजन बाई ह छत्तीसगढ़ी संस्कृति ल ‘पंडवानी’ के प्रदर्सन ले देस-दुनिया म पहुंचाइस हे, जेमा महाभारत के परसंग ल गायन, मंचीय प्रदर्सन अउ परम्परागत वाद्य यंत्रों के संग जीवंत करे जाथे.’