झीरम  म बोलिस गृहमंत्री ताम्रध्‍वज साहू…. मुख्‍यमंत्री ही  जादा बेहतर बता पा ही

सूबा म लॉ एंड आर्डर ल बेवस्थित करे बर कवायद तेज

रायपुर । झीरमघाटी के मामला म एसआईटी गठन ल लेके जब गृहमंत्री ताम्रध्वज साहू ले पूछे गिस त उमन कहिन के ए मामला ल खुद मुख्यमंत्री देखत हवय। त उमन ही जादा बेहतर बताही।

दरअसल छत्तीसगढ़ के नवां कांग्रेस सरकार के नवां गृहमंत्री ताम्रध्वज साहू  ह पुलिस विभाग के बारीकी मन ल जनाने  बर सोमवार के पुलिस मुख्यालय म समीक्षा बइठक ले हे। बइठक म डीजीपी, एडीजी, गृह सचिव अउ सबो संभाग के आईजी सामिल होइन। नवां सरकार के बने के बाद सूबा म लॉ एंड आर्डर ल बेवस्थित करे बर कवायद तेज होगे हे अउ  पहिली  ही दिन मुख्यमंत्री भूपेश बघेल ह स्मार्ट पुलिसिंग के बात कहि के ए बता दिस के  सूबे म अब पुलिस के ढीला रवइया ले काम नइ चलही।

अब  एखर बर सूबे के गृहमंत्री ह सुरुआत घलो कर दीस हे। गृहमंत्री ह अपन पहिली समीक्षा बइठक म पुलिस विभाग के सबो बारीकि मन ल समझे के कोसिस सुरू कर दीस हे। गृहमंत्री ताम्रध्वज साहू ह  सबो अधिकारी मन ले गृह विभाग के काम काज ल जानिस अउ  आवश्यक दिसा- निरदेस घलो दिस। मंत्री ताम्रध्वज साहू के कहिना हे के  पुलिस विभाग म  बेहतर  काम होवय एखर बर भरपूर कोसिस करे जात हे।

उहें झीरम घाटी के मामला म एसआईटी गठन ल लेके गृहमंत्री ताम्रध्वज साहू  के कहिना हे के ए मामला ल मुख्यमंत्री देखत हवय एखर सेती उमन  ही जादा बेहतर बता पाही। एती  डीजीपी अवस्थी ह बताइस के  गृहमंत्री ह पुलिस विभाग के सबो आला अधिकारी मन संग  बइठक कर के समीक्षा करिन हे।