रायपुर। संचार क्रान्ति योजना म छत्तीसगढ़ सरकार ह राज्य के 50 लाख लोगन ल फोकट म फोन बांटे बर समयबद्ध कारयक्रम तइयार कर ले हे। येखर वितरन दू चरन म करे जाही। पहिली चरन म राज्य के सहरी क्षेत्र मन म स्मारट फोन बांटे के कारयक्रम इही महीना के 30 तारीख ले सुरू होही अउ 16 अगस्त तक चलही। उहें ग्रामीन क्षेत्र म स्मारट फोन का वितरन 17 अगस्त ले 22 सितम्बर तक होही। ये ह देस म अपन किस्म के पहिली योजना हे, जेमा 45 लाख महिला मन अउ 5 लाख युवा मन ल स्मारट मोबाइल फोन देय गिस हे।
मुख्यमंत्री डॉ. रमन सिंह ह ये ला अपन 14 बठर के कारयकाल म अब तक के सबसे महत्वपूरन योजना बतात हुए कहिन के येखर जरिया राज्य सरकार ये सुनिश्चित करही के प्रदेस के हर नागरिक ल सूचना सेवा अउ पारदरसी सुसासन के अधिकार मिले । मुख्यमंत्री ह कहिन के ये देस के पहिली अइसे योजना हे, जे महिला मन अउ युवा मन के ससक्तिकरम बर सुरू करेगिस हे, लेकिन येखर व्यापक लाभ आम जनता ल मिलही। डॉ. सिंह ह कहिन के-लगभग 1500 मोबाइल टॉवर मन के स्थापना ले राज्य म मोबाइल फोन बर नेटवर्क के व्यापक विस्तार होही।
ये योजना म सामाजिक-आरथिक जनगनना 2011 के अंतरगत सामिल सबो गरीब ग्रामीन परिवार अउ सहरी परिवार के महिला मन ल अउ कॉलेज स्तर के विद्यार्थी मन ल मोबाइल स्मारट फोन के वितरन करे जाही। ये मा हर महीना एक जीबी डेटा अउ 100 कॉलिंग मिनट्स के फोकट म सुविधा मिलही।
उमन बताइन के स्मारट फोन के ‘गोठ’ एप्प म महिला मन, किसानो मन, लइका मन अउ युवामन बर बिभिन्न बिसय मन के उपयोगी जानकारी धलो सामिल रहही।
