छत्तीसगढ़ी सिनेमा हमर लोकसंस्कृति अउ अस्मिता के जीवंत दस्तावेज – मुख्यमंत्री विष्णु देव साय
रायपुर। मुख्यमंत्री विष्णु देव साय आज राजधानी रायपुर के साइंस कॉलेज परिसर स्थित पं. दीनदयाल उपाध्याय ऑडिटोरियम म छत्तीसगढ़ फिल्म विकास निगम द्वारा आयोजित “छत्तीसगढ़ रजत जयंती के अवसर म छत्तीसगढ़ी फिल्म के सफर” कार्यक्रम म शामिल होइस। ए अवसर म मुख्यमंत्री ह छत्तीसगढ़ी सिनेमा के विकास यात्रा, उपलब्धी अउ उज्ज्वल भविष्य म विस्तार ले अपन विचार साझा करिन।
मुख्यमंत्री साय ह अपन संबोधन म छत्तीसगढ़ फिल्म विकास निगम के गठन म पूर्व मुख्यमंत्री डॉ. रमन सिंह के योगदान के स्मरण करत कहिन कि छालीवुड के सशक्त नींव रखे म उखर महत्वपूर्ण भूमिका रहिन हे। ओमन ह निगम के प्रथम अध्यक्ष स्वर्गीय राजेश अवस्थी के पुण्य स्मरण करत कहिन कि उखर असामयिक निधन न केवल छत्तीसगढ़ी सिनेमा, बल्कि पारे प्रदेश बर अपूरणीय क्षति हे।
मुख्यमंत्री साय ह कहिन कि छत्तीसगढ़ी सिनेमा आज एक नवा दौर म प्रवेश कर चुके हे। ओमन ह निगम की वर्तमान अध्यक्ष मोना सेन ल एक अनुभवी, कर्मठ अउ समर्पित कलाकार बतात विश्वास जतायिन कि उखर नेतृत्व म छालीवुड के चहुंमुखी विकास सुनिश्चित होहि। मुख्यमंत्री ह कहिन कि अवइया समय म छत्तीसगढ़ी फिल्म राष्ट्रीय अउ अंतरराष्ट्रीय स्तर म प्रदेश के संस्कृति, कला अउ पहचान ल अउ अधिक सशक्त रूप म स्थापित करहि।
मुख्यमंत्री साय ह छत्तीसगढ़ म फिल्म निर्माण के ऐतिहासिक यात्रा के उल्लेख करत कहिन कि साल 1957 ले प्रदेश म फिल्म के निर्माण के सिलसिला प्रारंभ होइस। ओमन ह भूलन कांदा उपन्यास म आधारित फिल्म “भूलन द मेज” ल प्राप्त राष्ट्रीय पुरस्कार ल पूरा प्रदेश बर गौरव के विषय बतायिन। मुख्यमंत्री ह कहिन कि छत्तीसगढ़ी सिनेमा के जड़ें लोक संस्कृति, लोककथा अउ सामाजिक सरोकार ले गहराई ले जुड़े हें, जेन एला विशिष्ट पहचान प्रदान करत हे। ओमन ह कहिन कि छत्तीसगढ़ी सिनेमा हमर लोकसंस्कृति अउ अस्मिता के जीवंत दस्तावेज हे।
मुख्यमंत्री ह कहिन कि राज्य सरकार छत्तीसगढ़ी फिल्म के विकास ल लेके पूरा गंभीरता अउ प्रतिबद्धता के संग कार्य करत हे। इही क्रम म चित्रोत्पला फिल्म सिटी के निर्माण करे जात हे, जेखर बर 150 करोड़ रुपया के राशि स्वीकृत करे गिस हे। ओमन ह विश्वास व्यक्त करिन कि प्रदेश म छालीवुड के भविष्य स्वर्णिम हे अउ फिल्म उद्योग ल नवा ऊंचाइ तक ले जाए बर सरकार हर संभव सहयोग प्रदान करहि।
मुख्यमंत्री साय ह छत्तीसगढ़ राज्य के रजत जयंती वर्ष के शुभकामनाएँ देत कहिन कि ए ऐतिहासिक वर्ष प्रदेश के चहुंमुखी विकास के नई इबारत लिखत हे। ओमन ह आशा व्यक्त करिन कि ए कार्यक्रम छत्तीसगढ़ी फिल्म विकास के दिशा म एक मील के पत्थर सिद्ध होहि।
मुख्यमंत्री साय ह ए अवसर म छत्तीसगढ़ी सिनेमा म उल्लेखनीय योगदान देवइया निर्माता अउ वरिष्ठ कलाकार मोहन सुंदरानी, सतीश जैन, संतोष जैन, मनोज वर्मा, अनुज शर्मा अउ प्रेम चंद्राकर ल सम्मानित घलो करिन।
Other Articles
विकसित भारत–जी राम जी, रोज़गार के गारंटी, सम्मान के सुरक्षा
