नवनीत शुक्ला, मुंगेली
सफाई के पता नई हे तभो ले मुंगेली जिला ल मिले रहिस हमर देस के प्रधानमंत्री नरेंद्र मोदी के हाथ ले ओडीएफ के तमगा। काबर कि हमर मुंगेली के बहुत बड़े खासियत हे कि इहां हर काम कागज म हो जाथे। चाहे बात शौचालय के होवय या साफ सफाई के या फेर आवास के, हर जगह मुंगेली ह अपन नाम ल रोशन करत हे। केंद्र सरकार के स्वच्छ भारत मिशन के तहत अवईया पईसा कहां जाथे पता नई। गांव म एे हालत हे कि उहां न तो शौचालय ठीक ले बने हे अउ न आवास के गुणवत्ता पूर्ण निर्माण होय हे। इहि हाल नगर पालिका के बने आवास म तक देखे जा सकथे।
एक कोति जिहां केंद्र सरकार ह स्वछता अभियान चलावत हे उहें मुंगेली के अधिकारी मन अपन पीठ थपथपाए बर सिरिफ कागजी लीपापोती करत हे। एखर उदहारण हमर प्रदेश सरकार म मंत्री अउ मुंगेली बिधायक के गोद ग्राम देवरी म देखे बर मिलथे। जिहां के शौचालय,, सीसी रोड़,, नाली,, आवास,, सब के हालत ह अबड़ ख़राब हे। कई घर के शौचालय मन मा न दरवाजा लगे हे,, न छबाय हे न पोताय हे,, कोनो-कोनों जगह पर्दा लगा के काम चलत हे। शौचालय के बइठे के सीट घलोक टूट गेहे ,,सोख्ता के गढ्ढा हर खुल्ला परे हे जेन म नान-नान लइका मन के गढ्ढा म गिरे के घलो ख़तरा हे। दीवाल अउ छत म दरार आ गेहे, कई जगह के शौचालय हर तो गिरे के हालत म आगे हे। गाँव के आदमी मन अपन घर म बने शौचालय ल अब डर्राए ल घलो लाग गे हे। काबर कि कब भासक जाहि तेखर कोनों पता नहीं हे। इही कारण हे कि कई झन शौचालय के जगह म नई जाए। लोटा धरके बाहिर खुले मैदान म शौच बर जाथें। जहाँ सरकार ह अतका पैसा खर्चा करत हे। उहें गांव वाले मन म सरपंच अउ सचिव के लापरवाही के चलते अउ मंत्री के गोद ग्राम के अनदेखी के सजा ल देवरी गांव के जनता हर भोगत हे। एखर बाद भी हमर मंत्री ह आज तक गांव के सुध नई लेवत हे।
ऐ बात ह सिरिफ देवरी भर के नोहे मुंगेली जिला म आने वाला हर पंचायत म इही हालत हे। आवास पूरा होय के बाद हितग्राही के उपयोग करे के पहिली ओमन ल उपयोगिता प्रमाणपत्र न तो आवास बर दे गे हे न शौचालय बर। निर्माण के समय म तक कोइ जाँच बर गिस ये बात ह कहना उचित नहीं हे काबर की अगर गे होतिस तव ये हालत नई होतिस निर्माण के। ये सब म बिधायक के चु्प्पी ह चिंता के बात हे। लोगन मन के कहना हे कि कई पईत जनदर्शन म ए बात के शिकायत करे गिस लेकिन आज तक कोनो सुनवाई नई होइस। अब मंत्री जी ले ही उम्मीद हे कि वो दखल देवय अउ अपन जनता बर कुछ करय।
