छॉलीवुड के पहिली महिला डायरेक्टर भारती वर्मा बर जून के महीना काबर हे खास.. का जीरो सच म बनही हीरो..?
Cinema36. छत्तीसगढ़ फिलिम इंड्रस्ट्री के पहिली कमर्शियल सिनेमा डायरेक्टर भारती वर्मा बर जून महीना के ए बेरा ह बेहद महत्वपूर्ण हे। बतौर प्रोड्यूसर तो ओमन ह अभी तक सफल रेहे हे फेर बतौर डायरेक्टर ओ ह कामयाबी के सेहरा बांधे बर तियार हे। वईसे ए कामयाबी के पैमाना का होही ए तो अवईया बेरा ह बताही फेर उंखर इरादा ह अभी ले बतावत हे कि अपन सर्वश्रेष्ठ देवई ओखर बुता हे उऊ ओखर नजीता का होही ए त जनता अऊ दर्शक के असीस म डिपेंड करथे।
“जीरो बनही हीरो“ फिलिम भारती वर्मा बर कई मायने म अहम माने जात हे। ए फिलिम के सफलता ओमन ल आज के बेरा म दूसर नंबर के निर्देशक के रूप म स्थापित कर सकत हे। अऊ महिला निर्देशक म ओमन टॉप पर पहुंच सकत हे। काबर कि ए बछर कोनों निर्देशक नई चल पाए हे, सतीश जैन ल छोड़ दे जाए त।
बता देन कि इंडस्ट्री म भारती वर्मा के पहचान दो टूक अऊ स्पष्टवादी महिला के तौर म बने हे। ओमन जतेक भावुक हे ओतने प्रोफेशनल घलो हे। ओमन ल बुता करईया मनखे मन ले लगाव हे, काबर के ओ मन खुदे दिल लगा के मिहनत करथे। एखरे सती ओमन दूसर मन ले उम्मीद करथे कि ओखर ले जुड़े जम्मो टीम मेंबर मन वईसने बुता करे।
30 जून माने कि काली “जीरो बनही हीरो“ रिलीज होवत हे। एखर हर स्तर म तियारी करे जा चुके हे। पब्लिसिटी म घलो कोनों कोर-कसर नई छोड़े गे हे। गाना मन के घलो जबर ब्रांडिंग बर मेहनत करे गे हे। गोल्डन ड्रीम प्रोडक्शन के कोनों बेरा म कुछ हजार सब्सक्राइबर रिहिस जेन आज लाख भर के तीर खड़े हो गे हे। ए मिहनत के बाद अब फईसला त जनता ह फिलिम ल देख के दिही फेर देखना ए होही कि बतौर निर्देशक पब्लिक ह ओमन ल कते प्यार देथे।
ट्रेलर रिलीज की स्ट्रेटेजी म दिखिस भारती के दिमाग
प्रोड्यूसर अऊ डायरेक्टर भारती वर्मा ह “डार्लिंग प्यार झुकता नही“ अपन होम प्रोडक्शन गोल्डन ड्रीम प्रोडक्शन म अपलोड करे हे। ए फिलिम ह यूट्यूब म 6 मिलियन ले जादा व्यू पा डरे हे अऊ बड़ तेजी ले देखे जात हे। काबर कि एमा इही अंदाजा लगाए गे रहे होही कि अपकमिंग मूवी “जीरो बनही हीरो“ के ट्रेलर ल लांच करे बर ग्राउंड तियार हो जही। अऊ होईस वईसने अब तक 7 लाख ले ज्यादा लोगन मन “जीरो बनही हीरो“ के ट्रेलर ल देख डरे हे। ए तो होईस ट्रेलर के गोठ यदि यूट्यूब म सिरिफ फिलिम ल सर्च करबो त विडियो मन के कतार लग जथे। एखर ले समझ म आवत हे कि प्रमोशन घलो कतना पुख्ता करे गे हे। पांव के पैरी वाला गाना घलो पहिली ले धूम मचावत हे।
का हे फिलिम म…?
वईसे ट्रेलर देखके इही लगत हे कि ए फिलिम ल अईसे गुलदस्ता ले तियार करे गे हे जेमा लव, इमोशन, कॉमेडी अऊ एक्शन के फूल ह माहकत हे। मन कुरैशी अऊ भूमिका दास के जोड़ी त जमते हे किसन सेन अऊ पूनम साहू झमाझम अवतार म दिखाई देवत हे। पूरन किरी के किरदार देखके लागत हे कि अब तक के बिगेस्ट कंटेंट करईया हे। आर मास्टर के कॉमेडी ह घलो गुदगुदावत दिखत हे। त उहें अंजली चौहान साहसी मां के रुप धर अपन अदायगी के लोहा मनवाए बर तियार हे।
