रेत के उत्खनन अऊ अवैध परिवहन के गोरखधंधा जोरों म

राजनांदगांव। जिला म सल्लग सिकायत मिले के बाद घलो इलाका म नदिया ले अबैध रूप ले रेत के उत्खनन अऊ अवैध परिवहन के गोरखधंधा चलत हे। रेत तस्कर मन बिना कउनो डर के रात के अंधियार म नदिया ले अबैध रूप ले जेसीबी मसीन के माध्यम ले अवैध रूप ले उत्खनन कर ट्रक अऊ डम्पर के माध्यम ले लेजात हे। जिला के डोंगरगाव ब्लॉक के पैरी नदिया के तीरे लगे गांव भरदा ,केसला ,टोला गांव सहित दर्जन भर गांव म बिना अनुमति करोड़ो रूपिया के रेत के उत्खनन अऊ परिवहन करे जात हे। रेत माफिया मन के ये करतूत ले हर दिन हादसा होत रहिथे। पाछु दिन डोंगरगाव ब्लॉक के ग्राम केसला म रेत ले लदे एक बाहन के हेल्पर दब गिस। येला लेके ग्रामीन मन ह हंगामा कर दिन अऊ रेत चोरी के सिकायत खनन बिभाग समेत प्रसासन ले करिस, फेर अब तक कउनो कार्रवाई नइ होइस, येति प्रसासन अऊ खनन अधिकारी रेत चोरी बर ग्रामीन मन ल जिम्मेवार बतात हे। फेर अधिकारी मन जांच कर कार्रवाई के भरोसा दिस हे।